கலைமகன் கவிதைகள்: உதிர்ந்தது ஒரு பூ!

ஞாயிறு, 22 மார்ச், 2020

உதிர்ந்தது ஒரு பூ!

ஜனனியில் கால்பதித்தபோது
அங்கு நானும் நீயும்
உல்லாசமாக நின்றோம்...

எனக்கான மேசைப் பக்கமாய்
நீயும் வந்தமர்ந்து
இலக்கியம் பற்றி
ஏற இறங்கப் பேசினாய்...
கடைக்குட்டியாகவே
அன்றிருந்தேன் நான்...

பத்திரிகை பற்றி
ஏதும் அறியாத பால்ய பருவம்
தேடலில் ஈடுபடவே
சதாவும் மனம் விரும்பும்
காலமது...
மேமன் சமூகத்து
நீயோ அப்துல் கலாமாய்

திரைக்குள் இருந்தவற்றை
திறம்படவே எழுதித் தள்ளினாய்
வாசகர்பால் பெருமதிப்பு
ஜனனிக்கு வருதற்கு
வழிகோலினாய்...

குப்பைப் பத்திரிகை என்று
சிலர் முனங்கியபோது
உன்னாலும் என்னாலும்
தூசுதட்டப்பட்டன...
உன்னால்தான் நானும்
துடைப்பத்தைக் கையிலேந்தினேன்..

மாணாக்கர்க்கான ஆக்கம்
அரிவையர் அரங்கம்
சிறுகதைச் செப்பனிடல்
என்பாற்பட
உன்பாடே மிகுதமாய் நின்றது...

விழாக்களில் அடிக்கடி சந்தித்தோம்..
விலாவாரியாய் விலா பிடித்தே
அளந்து பேசினோம்...
வகவத்திலும் சந்தித்தோம்...
வரிசையாகவே நின்றன
உன் உறவுதான்...

ஆறாம் விரலை நீட்டி
நிமிர்த்தினாய்
உனக்கென தனிவட்டம்
தானாய் அமைந்தது...
உன்னை நீ
திரைநிலவன் என்றுதான்
சொல்லிநின்றாய்...
நீ பல்கலை என்பதை
இலக்கிய உலகு நன்கறியும்...

புதிய பூக்களைத் தந்தவனே
நீ உதிர்ந்தாய்...
கவலைகளைச் சுமக்கவைத்து...
உலகின் பேரதிர்வுகள் பலகண்டு...
இறையிடம் நீசென்றாய்
மீட்சிக்காய் இறைஞ்சுகிறேன்...

உன்மதிவதனம் ஏன் உயரமுந்தான்
எந்நேரமும எமக்குள் காட்சிதரும்...

கலை என்று எனை நவிலும்
நவாஸ் நானா,
உன் பிழைகள் பொறுக்கப்பட்டு
உயரிய சுவனத்தில் நுழைய
உயரிய இறை அருள்புரியட்டும்!

-மதுராப்புர,
கலைமகன் பைரூஸ் (கலை)

(பிரபல ஊடகவியலாளரும், எழுத்தாளரும், பன்முக ஆளுமையுமான இன்று (22.03.2020) இறையடி சேர்ந்த நண்பர் 'திரைநிலவன்' நவாஸ் நானாவின் நினைவேந்தி எழுதியது.)

கருத்துகள் இல்லை:

கருத்துரையிடுக

இதற்கு குழுசேர்: கருத்துரைகளை இடு (Atom)

கருத்துரை 1

கலைமகன் பைரூஸ் வளர்ந்து வரும் ஒரு சிறந்த கவிஞர்.கவிதை எனப் பார்க்கும் போது இவரது மரபுக் கவிதைகள் உச்சத்தை அடைகின்றன.சந்தம் மிக்க கவிதைகளாகும்.மரபை ஆழமாகக் கற்ற கவிஞர். வெலிகம என்ற ஊரின் பெயருக்கு புகழ் சேர்க்கும் கவிஞர் என்பதில் எவ்வித ஐயமுமில்லை.இவரது அரங்கக் கவிதைகளும் சுவையானவை.

-எழுத்தாளர் வதிரி. சீ. இரவீந்திரன்

புலவராய் எனை ஏத்தினார் தம்மிக ஆசான்

என் தமிழ் கண்டு, எனை என்றும் ஏற்றிப்போற்றும் உருகுணைப் பல்கலைக்கழக சிரேட்ட விரிவுரையாளர் திருமிகு தம்மிக ஆசான், முகநூல் உள்பெட்டியில் எனை 'புலவர்' எனப் போற்றினார். இதுவும் எனக்குக் கிடைத்த பாரிய சான்றிதழாய் எண்ணுகிறேன். காழ்ப்புக்களுக்கு மத்தியில் சகோதர மொழியியலாளரின் உண்மையான போற்றுதல்..

கருத்துரை 2

கலைமகன் பைரூஸ் மரபினை கைவிடாத கவிஞர். பழம்பெரும் புலவர்களின் சொற்களையெல்லாம் பைரூஸின் கவிதைகளில் கண்டு சொக்கியிருக்கிறேன். தமிழ் பண்டிதராக தன்னைக் காணத்துடிக்கும் சகோதரர் கலைமகன் பைரூஸுக்கு வாழ்த்துகள்!

-கவிமணி என். நஜ்முல் ஹுஸைன்

கருத்துரை 3

உங்கள் சிந்தனையில் பதியமிடப்பட்ட ஆக்க விதைகளில்இருந்து சுவைக்கபடும் தமிழ் பழங்கள் இனிமையானவைகள் எதற்கும் ஒப்பிட்டுச் சொல்லமுடியாதவைகள் வாழ்த்த்துக்கள்!
நீடுபுகழ் நிற்க நிலம்!

-கவிதாயினி கலைமகள் ஹிதாயா ரிஸ்வி

கருத்துரை 4

தமிழ் கவிதை இலக்கண சிறப்பான அறிதலுடன் கவிதைகளை ஆக்குபவர். மேலும் தமிழ்க் கவிதைகளை சிங்களத்திலும், சிங்கள கவிதைகளை தமிழிலும் மொழிபெயர்க்கும் முயற்யில ஈடுபடுபவர். அதிலும் குறிப்பாக தமிழ்க் கவிதைகளை சிங்களத்தில் மொழிபெயர்க்கும் இவரது ஆற்றல் கவனத்திற்குரியது. இந்த ஆற்றல்.மிக்கவர்கள் நம்மத்தியில் குறைவு என்ற வகையில் இவரது அப்பணி பாராட்டதக்கதும், போற்றதலுக்குரியது.

-கவிஞர், எழுத்தாளர் மேமன்கவி